قصيدة أرسلها الملك فهد رحمه الله إلى الامير فهد بن سعد رحمه الله عندما كان مريضاً في لندن في شهر شوال من عام 1385هجري:
يابو سعد صارت على اخوك غارات=شهرين اقاسي من شديـد الغرابيـل
سو المرض يحمل على اخوك حملات=مافي يدي حيله ولا في يـدي حيـل
والله فزع من فوق سبع السمـاوات=وانا احمد الله يوم صارت تساهيـل
ماينفع الخايـف والايـام عجـلات=الخوف ماينفـع ولا القـول والقيـل
حنا هـل العوجـا ولا بـه مـراوات=شرب المصايب مثل شرب الفناجيـل
لاشك انا مشغول في كـل الاوقـات=على الـذي حنـا بظلـه رجاجيـل
ماني على نفسي كثيـر الحسافـات=لاسلم راسه روسنا رفـاع بالحيـل
حامـي حمانـا بالليالـي المخيفـات=لـو صـار بالعالـم كثيـر الزلازيـل
فخر العروبـه بالعـدل والمسـاواه=هذا هو (الفيصـل ) ولا فيـه تشكيـل
يشهد له اللي شاهـدوا منـه ليـات=ويشهد له التاريخ جيـل بعـد جيـل
فرد عليه الأمير فهد بن سعد:
يامرحبـا بكتـاب زبـن المـخـلات=أهـلا هلا بـه عـدّ وبـل الهماليـل
حمدت مـن زال الكـدر بالمسـرات=فكاك مـن صكّت عليـه المحابيـل
فـزع لـك اللـي عالـمٍ بالخفيـات=مبري جروح أيوب غيـث المراميـل
لعل مايزعج علـى فقـدك أصـوات=ولعلهـا لـك يابـو فيصـل تماهيـل
الله يجيرك مـن صواديـف الآفـات=عسـاك تسلـم ياعشيـر المشاكيـل
ما أنت برخيـصٍ ياربيـع القرابـات=لو هي بالايدي كان دونـك حلاحيـل
ترى لنا بـك يافتـى الجـود هقـوات=في وقتنا الحاضـر وباللـي مقابيـل
يفـداك ربـعٍ قصـروا بالمهـمّـات=اللي على القـالات ماتنطـح الشَّيـل
بعض العرب حي ومن عرض الأموات=مايرتجـي نفعـه بحـل المشاكـيـل
وفيصل ذرانـا بالسنيـن المخيفـات=هو درعنا الضافي الى ضدنـا الميـل
اللـي نقـل عنـا حمـول ثقيـلات=راس الحصيـل إن كملـنّ المحاصيـل
يابو سعد - قصيدة للملك فهد رحمه الله
